翻看波蘭及俄羅斯的陣容，可見到兩國國腳的風格大不同，波蘭兵喜歡到國外聯賽搵食，而俄羅斯球員就不愛外流，大部份在俄超落班。
在波蘭的23人名單中，有多達18名球員在國外落班，遍佈歐洲各大聯賽；其中以德國最受歡迎，有7名波蘭國腳為德國球隊效力；最為人熟識的肯定是多蒙特3子：羅拔利雲度夫斯基、巴拉斯塞高斯基及比薛斯基。

俄國得兩個外流兵

其實，波蘭是德國東邊的鄰國，文化接近，交通方便，而且德國足球水平遠高於波蘭聯賽，所以波蘭球員順理成章地喜歡到德國搵食。另外，為闖出名堂，亦有波蘭兵遠離家鄉，像中場韋巴斯效力俄超的泰歷克，而哥錫基及美亞斯祖斯基更去到土耳其發展。
08歐國盃，俄羅斯一戰成名，艾沙維、施哥夫及柏夫里約真高紛紛跳槽英超，但幾年過後，後兩者已經回到俄超；而艾沙維也由阿仙奴外借返辛尼特，就算將沙皇計算在內，俄軍陣中亦只有3名外流兵，另外兩人是普格恩耶克及伊斯米洛夫。作為金磚五國之一，俄羅斯的球會越來越富有，球員的待遇絕對拍得住英超；加上西歐的語言、文化與俄國大相逕庭，所以俄兵近年寧願回家鄉搵食。
咖喱