大年初一，先祝願大家財源廣進龍咁威！新年頭炮係資本策略（497）。資策喺投資界高手鍾楚義入主後，資產及業績越嚟越靚仔。好似上年年尾發佈2012年半年度成績表，純利升咗近11倍到13億銀，兼且主要反映物業交易收成，無水份。
資策家陣市值有幾多？18億銀咁大把。就當下半年度再無進賬，資策全年度都肯定大豐收，PE得1倍幾單位數。又啱新春假前，旗下藍塘道豪宅TheHampton一個複式戶，以1.7億銀成交，資策應該繼續肥仔水。又舵主鍾生，呢期計劃收購部份股份，作價每股0.255元，真金白銀投資策信心一票，而現價仲係潛緊水。買資策博翻半番到0.34元，只係高出鍾生作價33%，NAV折讓50%，仍然抵買。