到底馬國明同洪永城有咩關係？佢哋兩個嘅接合點，應該係得個唐詩詠，馬明同唐詩詠契兄妹關係，洪永城同唐詩詠就係情侶，有傳兩個男嘅為爭女而不和。

馬明同洪永城噚晚喺中環出席G-SHOCK手錶宣傳活動時，全程零交流，雖然論資排輩，出場、開口、同司儀交流都係馬明行先，但係佢哋兩個，真係連祝酒碰杯都冇話互望一眼。

數數手指，馬明同洪永城都算「兄弟」一場，就係真係爭女，或真係不和，拉到最遠嘅關係都叫同事喇啩？但係，佢哋真係零交流，睇怕同場嘉賓分分鐘都有個微笑點頭，但佢兩個，真係冇。

「情敵檔」上陣，唔知係咪份外眼紅，只係覺得佢哋似目中冇對方多啲，不過，佢哋把口就好一致嘅（好似係）。馬明笑言，希望將來有更多緋聞情敵出現，帶挈工作量；洪永城就話今次係噱頭，可能殺出一條新血路，馬明仲話：「人哋鏡頭前好好，鏡頭後面阻阻，我哋就調轉。」但事實所見兩人堅係零交流，洪永城就回應：「我哋係騷錶，唔係我哋關係。」馬明話幾鍾意情敵檔，希望日後可以一齊登台唱歌搵錢。

喺呢個時候，洪永城就要爆喇！佢問：「咁使唔使分番畀中間女主角？」馬國明好精明話:「係都你分啦，我就兄弟姊妹得閒食飯就得啦 。」洪永城話會分番錢畀唐詩詠。問到佢哋今次嘅工作酬勞？馬國明有意無意話:「洪永城好犀利好貴㗎 ！」洪永城就反擊話自己係比馬國明低少少，有五位數字 。

馬明同洪永城都話接job時已經知道對方嘅存在，洪永成仲話要搞多啲新聞，o依家爭個鬆踭，馬明答佢：「如果多兩、三個job，俾你鬆一踭都冇所謂。」喂，係咪咁等錢使先？

問到佢哋之後會唔會合作拍劇？佢哋先係答未知，殊不知馬明跟手寸洪永城：「o依家啲人係叫佢『一哥』㗎！」洪永城即局住謙稱自己係「洪仔」啫。咁樣唇槍舌劍、句句有骨，點都睇得出佢哋生疏扮客氣，但馬明聞言又賣晒關子話:「唔可以穿，要吊吓人哋，等人哋覺得我哋係咪真係爭女，咁先至多嘢做。」洪永城之後又攬住馬明示好，搞到好似hehe咁。洪永城話有同女友唐詩詠講同馬明開工，女方個反應係「咁得意？」：「仲問佢幾多錢叫我分番畀佢，好直接。」哦，唔怪之得你話會分錢畀女友啦……