側田同許廷鏗今日到灣仔伊館，為聽晚港台活動《能者舞台非凡夜2017》舉行綵排記招，佢哋分別會同失明、肢體殘障人士演出，雖然以往都有參與傷健共融演出，但每次都喺拍檔身上有所得着，正如許廷鏗指第一日同失明女歌手蕭凱恩、肢體傷殘鋼琴手鄧卓謙見面，對方不停以古典樂用語傾談，令佢自覺於音樂領域上要再深造，而側田就指拍檔肢體傷殘唱作歌手施朗明比佢記自己記歌詞仲叻，側田笑住話：「今次演唱會我首要練係記歌詞，盡量唔靠睇字幕機。」至於會否準備操弗騷肌，側田笑指許廷鏗先有本事，佢自己免得令觀眾退票，又開玩笑話：「好啦，我會騷腹肌，幾多嚿就賣關子。」