人氣高企嘅前財政司司長曾俊華，獲港大羅致！港大政治與公共行政學系嘅網頁顯示，薯片叔已成為該系嘅客席教授（Adjunct Professor），奇怪嘅係，負責規管問責官員離職後嘅「前任行政長官及政治委任官員離職後工作諮詢委員會」，至今未有作出公布。

無論問責官員從事受薪或者無薪工作，只要離職未夠一年，都仲係喺冷河期，所以按道理，薯片叔出任呢個職位，係需要經委員會審批。究竟係港大相關學系「等唔切」，搶閘公佈攞咗彩先？定係諮詢委員會冇出新聞稿公告天下？八方亦好想知，委員會向薯片叔施加乜嘢工作限制？因此問過相關學系同委員會，至今未有回覆。至於港大發言人就話了解緊件事，未有具體詳情。

薯片叔嘅名字係出現喺該學系網頁嘅「兼職／榮譽／訪問學人」一欄，但未有任何詳情。除咗薯片叔，首位華人保安司黎慶寧、前高官兼申訴專員黎年、曾協助薯片叔助選嘅新民黨政策總裁袁彌昌亦都榜上有名。如果薯片叔真係講書，教大家乜嘢係政治、公共行政，唔知會吸引到幾多人去港大sit堂聽書呢？