幾日前畀騎士裁走嘅前鋒D鍾斯，因為佢遲咗交錢畀佢放波鞋嘅倉，搞到佢珍藏嘅208對Nike（一剔）波鞋畀人拎咗去拍賣，唔通真係禍不單行？

據美國八卦網站《TMZ》報道，D鍾斯放咗208對「一剔」波鞋喺亞特蘭大嘅儲存倉已經好多年，有啲仲係非常罕有嘅特別版，甚至有特登幫rapper Fat Joe整嘅sample，點知呢個倉嘅負責人就聲稱D鍾斯遲咗交錢，上星期就拎咗佢啲鞋去拍賣，成交價最後大約係4,000蚊美金（約31,000港幣）。

D鍾斯都好坦白，佢認自己係遲咗畀倉租，不過數目都唔夠400蚊美金，話其實只係小事一宗，好易解決嘅，唔使搞到拍賣佢啲鞋，又解釋話可能係之前嘅欺詐警報搞到佢張信用卡戶口停咗畀倉租……佢話自己同咗倉嘅負責人接觸咗話會畀番錢，點知對方都堅持拍賣佢啲波鞋，D鍾斯就話會考慮採取法律行動喎。至於佢啲珍藏波鞋嘅新主人，就話諗住將啲波鞋放喺eBay再賣過……

對於上季季尾加盟騎士、為騎士打咗15場季後賽仲贏埋NBA冠軍嘅D鍾斯嚟講，唯一好消息或者係有傳騎士可能會以老將嘅底薪合約簽返佢一年，囉！