當年今日
關於我們

【不得了】全盛時期身家等同大台市值 翠如爸爸減持股份

蘋果日報 2017/08/17 00:02

黃翠如聯旺黃永華

講起翠如BB(黃翠如),除咗會諗起「女神」、「蕭正楠」之外,仲會諗起「上市公司千金」。
話說翠如BB嘅爸爸黃永華擔任行政總裁嘅聯旺(8217)喺去年4月於創業版上市,仲被喻為「翠如BB股」,不過當時仲被證監會指股權過度集中,以0.27元上市嘅聯旺股價一路節節上升,上市半年幾,股價升超過60倍,當時《彭博》統計,聯旺喺去年全球升幅最高嘅新股咁話,而聯旺喺最高峰時,即係今年1月仲曾經上到26元,較配售價高99倍,一度成為神話。其中,以翠如爸爸持有聯旺約4.68億股,持股比例37.5%計,其身家最高達121億元,相當於一間TVB(511)。
不過喺今年6月尾出現「細價股大股災」,上市啱啱一年多少少嘅「翠如BB股」亦出現狂瀉,而喺上月包括翠如BB嘅爸爸黃永華在內嘅聯旺控股東先後喺四個交易日共減持近18%股權,套現逾1.47億元。而翠如爸爸持股量由37.5%降至約28.6%,而呢次套現個人獨得7,350萬元。
而「翠如BB股」最近亦每況愈下,昨日收市報0.37元,較開市跌超過1成。