經過星期日最後一輪分組賽，四強席位就全部誕生，A組首名葡萄牙就會周三喺俄羅斯喀山，同B組次名智利交手，基斯坦奴朗拿度（C朗）同阿歷斯山齊士（山神）兩大前鋒交手，C朗就上載冥想Look備戰呢場大戰。

葡萄牙所屬嘅A組，上周六已經完成分組賽，C朗又射入12碼下，以4:0大勝新西蘭拎到榜首；上周日練波就可以輕鬆啲，準備周三嘅四強大戰。貴為葡萄牙隊友，要幫國家隊繼上年歐國盃再下一城，拎埋洲際盃，當然有啲壓力，另一邊廂困擾C朗，就係逃稅同轉會風波；唔同美斯嘅律師團隊選擇妥協，C朗嘅律師似乎想同西班牙法庭就逃稅案打到底，之前已經列舉C朗以往向西班牙政府交多咗稅嘅證據，擺明唔想讓步。

另外最困擾更加係轉會風波，C朗盛傳愛回家想返曼聯，但所屬嘅皇家馬德里堅持唔肯平放，索價1.8億鎊（約17.8億港元）轉會費就嚇怕曼聯，搞到宜家轉會文易唔上唔落，唔好話踢埋洲際盃，似乎起碼7月中先有突破性進展。C朗周日就係個人IG上載一張冥想Look，前皇馬球探、現任里爾總監甘保斯就話估計C朗想表達同呢幾日冇比賽嘅日子，好好反思吓未來嘅路向。其實葡萄牙都唔係得C朗一個人食糊，好似新一季轉投曼城嘅翼鋒貝拿度施華，佢對新西蘭一戰就射入一球，但之後就傷出，好彩佢係Twitter報平安，話自己足踝冇份，應該可以趕及準決賽復出。