韓流始祖裴勇俊去年7月同女星朴秀珍結婚，上月佢哋升呢做父母，朴秀珍為裴勇俊誕下B仔。

未知是否朴秀珍仍然坐月中，所以裴勇俊日前就撇低老婆去咗睇BTS（防彈少年團）喺首爾舉行嘅粉絲見面會，睇嚟裴勇俊真係BTS嘅忠實粉絲，睇完騷佢就有入後台同BTS影合照。

事實上今年8月，裴勇俊已帶埋當時仲大緊肚嘅朴秀珍飛咗去日本睇BTS開騷，當時佢哋兩公婆都有喺後台同BTS影合照，可見佢哋兩夫婦十分欣賞BTS。