顧紀筠噚晚平安夜為老公陳仕偉，喺君悅搞六十歲大壽派對，兩公婆圈中人緣甚廣，唔少圈中名人及情侶都專誠捧場，兼一齊共度聖誕，而同樣係壽星女嘅鄺美雲，就帶埋男友林達民到賀，至於謝賢、狄波拉亦各自攜眷，仲有馬德鐘同太太﹑許冠文﹑胡楓﹑陳友﹑林曉峰一家等，場面熱鬧，不過講到最痴纏情侶，依然係林峯同吳千語呢一Pair。

愛到好似連體嬰嘅「峯語」，噚晚9點幾先到，林峯先落車，落車後佢企喺車側旁，好有風度咁等埋女友落車，而千語BB身穿黑色tubedress短裙騷長腿，同林峯嘅黑色西裝襯到絕。

雖然「峯語」拒絕受訪，但都大方企定任影，其間林峯亦攬住女友纖腰，至於千語BB呢，就好不經意咁舉起右手撥頭髮，但千語BB一舉手，見到無名指上面有隻鑽戒，唔通係訂婚鑽戒？