傅穎同樂隊Supper Moment今日喺坑口片廠拍攝Giordano秋冬服裝廣告，傅穎話o依家工作中、港兩邊走，最近接拍咗一部大陸劇，故事係講京港愛情故事，而佢就係男、女主角嘅閨密，成日要做和事佬，o依家好多時都喺香港拍攝，同劇仲有馬德鐘、許紹雄同梁小冰等，提到中港情緣，傅穎自嘲係現實版嘅一個寫照，佢話：「戲入面係happy ending，自己就唔係，o依家單身，已經冇乜想拍拖嘅感覺，可能上咗年紀。」提到Kary都已經生咗，傅穎話：「係啦，同我差不多年紀嘅都已經結婚生仔，但係自己冇特別想談戀愛，可能時機未到。」

另外，Supper Moment最近好受客戶愛戴，接咗唔少廣告，11月仲開埋紅館騷，似乎紅運當頭，佢哋笑言：「回顧返今年都有啲運仔，我哋不嬲好黑仔㗎嘛，但近來都好多好事，如果啲紅館飛賣晒就仲歡喜。」佢哋仲話希望將來可以拍吓樓盤、飛機廣告，等客戶可以送機票畀佢哋，等佢哋可以完成世界巡迴演唱嘅夢。

精選娛聞，喺晒《娛果》
http://fb.com/appledailyent