閩信（222）禾稈冚珍珠，揸住豐厚嘅資產價值未浮面，加埋有資產壯大概念，係時候收集。閩信揸住廈門國際銀行36.75%，應佔廈銀權益係以NAV入賬，實際價值未浮面。只係好保守計數，以閩信所佔廈銀權益約莫10億銀，以家陣內銀股平均1.6倍P/B入賬，閩信額外增值，已經達到6億銀，相當於閩信每股增值1.30元，閩信現價都係講緊2.20元。
又今年1月，閩信接到阿媽「福建省投資企業集團」通知，話連同阿媽在內嘅4間國有企業，或者會合併。要咁睇，若果連埋阿媽在內，4家大嘢合併，而閩信又係唯一嘅福建窗口旗艦，中線係存在好多超靚資產壯大嘅機會。又當呢個機會係零，單係計閩信資產價值浮面，已經有point買閩信。以閩信現價翻半番到3.30元計數，相對重秤後NAV，仲有45%折讓，實情仲有好多炒上空間。

九洲趁價殘收集

九洲發展（908）現價（0.31元），同03年沙士價已經差無幾。要咁睇，九洲上個月雖然發盈警，話08年度（12月底止）業績或者倒退。但九洲跌到呢個低殘位，NAV折讓高達73%，有咁大折讓墊底，冇有好怕。再講，九洲又係珠海市窗口，集團一樣有大把注資及業務壯大機會，但九洲市值得3.4億銀，現水位講注資，未必啃得落。正好趁價殘收集，以九洲NAV50%做目標，九洲價見0.57元，潛在回報率係講緊84%。
錢雋