天有不測之風雲，唔知去咗內訪嘅特首林鄭月娥會唔會感受良多？八方當然唔係講689冇得選、最終由佢頂上呢種政壇風雲，實際上林鄭真係受害人，皆因颱風天鴿噚日喺香港出沒，令到航班大受影響，身在杭州訪問嘅林鄭，原定噚晚7點由杭州返港，但班機取消咗，所以要喺杭州滯留一日，今日先返港。
林鄭噚日朝早仲喺上海，同上海市委書記韓正及市委副書記兼市長應勇會面。林鄭話兩地關係密切，好多港企都喺內地投資，首選就係上海，同時亦有好多內地企業到香港集資同上市，希望兩地合作達到更高台階。韓正就話港、滬關係特別密切，正籌備第4次滬港經貿合作會議。

傳閉門會鬧財金官員

林鄭之後就坐高鐵到杭州，同浙江省領導人會面，並參觀阿里巴巴集團總部。唔知大家記唔記得，盛傳林鄭年初曾因為阿里巴巴放棄來港上市，喺閉門會鬧財金官員唔做檢討，令香港落後於形勢？此行特別要見埋阿里巴巴主席馬雲，可見林鄭幾咁高度重視！
馬雲亦有講返事件，佢話對阿里早前未能在港上市好遺憾，認為唔係香港失去阿里，而係阿里失去在港發展機會，唔知係咪安慰林鄭？馬雲希望阿里未來幾年參與香港發展，加強喺科技同年輕人方面嘅合作，仲想香港終有一日變成「無現金城市」㖭！
馬雲仲話如果阿里巴巴喺杭州有「一國兩制」政策，唔知會做成點，「（因）既能享受獨特政策，也能享受國內政策」。

李八方