韓國男團JYJ成員朴有天去年6月當兵期間，先後捲入四宗性侵案，事後被判無嫌疑，不過事件就令佢形象跌至谷底，佢退伍後一直未有新工作。

日前朴有天又爆是非，被指兩個商住物業涉拖欠稅金，面臨被拍賣嘅危機。雖然爆出咁多是非，不過都無損佢同南陽乳業家族外孫女黃荷娜嘅感情，兩人原定今年秋天結婚，不過婚期一改再改，到0依家都未知係唔係已結婚，而黃荷娜不時就大晒手上疑似婚戒，令外界懷疑兩人低調成婚。

噚日黃荷娜就上載身在飛機上嘅短片，疑似同朴有天去咗旅行，當中佢哋就去到泰國嘅蘇梅島旅行，仲入住當地嘅W酒店。身在異地黃荷娜都好興奮，不停更新Instagram，上載多段短片及照片，當中佢就賣大包以泳裝示人，但係佢就好避忌，晒相時又刻意以心心圖案遮住事業線，但坐上水泡玩水時，佢又唔介意泳裝示人。而網民都猜測佢同朴有天同遊蘇梅島，仲話佢哋會唔會嚟當地度蜜月喎。

另外，朴有天嘅JYJ隊友金在中就趁聖誕節冧粉絲，趁噚日平安夜就變身做LINE嘅熊大，喺大邱街頭進行慈善free hug活動，引來唔少市民圍觀，不過金在中今次嘅行動就好保密，所以粉絲都唔知熊大入面就係金在中。

更多韓流，喺晒《娛果》
http://fb.com/appledailyent