將於大後日來港開騷嘅韓國女歌手IU，月初被爆跟大11歲嘅男歌手張基河暗撻兩年，之後IU亦承認戀情，仲表示希望可以好似普通人咁拍拖，而日前張基河演出音樂節目時，當主持人提起其女友IU，佢亦忍唔住於台上甜笑。

於前日播出嘅節目《柳熙烈的寫生簿》中，主持柳熙烈介紹張基河時用咗一首歌曲《我們現在見面》，之後又話：「聽講要喺星期五見面。」間接地提起IU嘅歌曲《Friday》（中譯《星期五見面》），明擺IU跟張基河嘅戀情上枱，而張基河聽後即忍唔住於台上甜笑作回應。