【20倍回報】樓市贏家長原彰弘:樓價一定會調整
亞洲聯合財務(UA)行政總裁長原彰弘,有「香港私貸之父」之稱,今年78歲,仍一直從事消費貸款業務。1996年時樓價升溫,他曾開拓按揭貸款,惟翌年金融風暴爆發,樓價急插,抵押品價值大跌,「1997揩咗嘢,之後冇做喇。」
住宅按揭不成功,但投資物業卻有心得。他出生於台灣、到日本留學工作、70年代到香港打拼。提到近年港人喜愛買日本樓,他笑言該國樓升值非常慢,日本兩層式住宅1965年時400萬日圓,到2000年時政府強制收樓,回收價為3,500萬日圓,升值只得8倍。
另一層在東京的物業,1977年時價值3,300萬日圓,到1998年樓市泡沫爆破之前,曾經升至1億日圓,「不過覺得就算去香港做嘢,喺日本都要留返個地方住,最後冇賣到。」近年他問日本經紀現時層樓值幾錢,「佢話只係值5,000萬日圓咋。」
「日本樓升得好慢,如果喺香港,個升幅已經100倍喇。」指的是1977年由長實興建的賽西湖大廈,「1977年開售,當時1,260呎,只係28萬蚊,依家差唔多2,700萬蚊,升咗100倍,高過日本好多。」
當時長原彰弘未有落注,不過到1982年終於入手,買入價為100萬元,計及現時升值仍超過20倍,遠勝日本樓投資。
香港加息周期開始,現時會否仍然諗住買樓?長原彰弘笑言息率上升0.125厘作用不大,然而樓太貴,未來樓價一定會調整,但不會急跌,「同埋買樓要畀稅啊,」故此未有入市打算。記者笑言可以找妻子或子女的名額去買,「佢哋全部都有樓。」咁孫呢?「佢哋仲係好細喎。」