韓國女團少女時代成員允兒孖性感歌姬李孝利、李尚順夫婦拍攝嘅節目《孝利的民宿2》，噚晚播出最新一集，民宿迎來第一批客人，係柔道部嘅女學生，打工妹允兒去超市為客人買露天溫泉用嘅新拖鞋及桑拿服，之後就開始打掃衛生，努力工作獲得李尚順嘅稱讚。

而女學生浸緊露天溫泉時，李孝利、李尚順夫婦亦播出TWICE新歌《Likely》，允兒立即聞歌起舞，連帶李孝利都興奮地一齊跳。隨後眾人傾偈時，一名女學生表示自己好鍾意朴寶劍，李孝利立即話：「朴寶劍曾經視我為理想型」，不過該女生就唔相信，李孝利仲搵新聞畀個女學生睇，相當搞鬼，李孝利隨即又指有機會都想見朴寶劍。

點知下集預告中，朴寶劍就以兼職打工仔身份驚喜現身民宿，由於事前眾人完全唔知情，所以連李孝利、允兒等人都唔相信，李孝利更激動到着住家居服就跑出去迎接朴寶劍。將於下集正式登場嘅朴寶劍，又會唔會刺激到節目收視呢？

最港電影大獎投票網址
http://bit.ly/thekongestfilmawards

更多韓流，喺晒《娛果》
http://fb.com/appledailyent