華華近日睇聯交所股權變動資料，發現中華煤氣（003）獨立非執行董事廖烈文最近賣晒所持有嘅煤氣股份，佢喺本月17、18及21號，分別以每股平均價19.37元、19.01元及18.99元，沽出28.9萬、139.8萬及46.5萬股，合共套現約4100萬元，持股量由0.03%減到零持股。唔通廖生想退休？
煤氣發言人就話，未有收到廖烈文會退休嘅消息。不過，廖生都成79歲，要退休亦屬正常。

創興為第三代接班人頭痕

廖生本身係創興銀行（1111）行政主席，但其實創興近年都年輕化，為淡化家族色彩，令管理層更富朝氣，1948年由廖氏家族創立原本叫廖創興銀行，喺07年初正式改名做創興銀行，行方仲為咗改名行動，大灑銀彈超過2000萬元廣告開支，推出多項大型宣傳活動，包括喺電視、報紙同雜誌賣廣告。
無端端改名，市場梗係揣測同放盤有關，但當時廖烈文就強調，冇計劃賣盤，大股東認為銀行仍然好有前途咁話。
尋找第三代接班人，一直係本地華資家族控股銀行最頭痕嘅事，廖烈文係廖氏家族第二代長子，兩位烈字輩嘅兄弟高層：廖烈武同廖烈智，亦已年逾或年屆七旬，家族第三代就有廖烈文個仔廖鐵城，現時擔任該行副行政總裁兼常務董事。其實廖烈文都可以放心退休。
李華華