要贏人，先要贏自己。「世界麻將大賽」噚日喺澳門永利酒店舉行，為咗贏到冠軍50萬獎金，參賽者都各出奇招，鬥牌技章法仲鬥騎呢。嚟自美國嘅24歲少女阿Jenn，噚日就以一身奇裝異服成功突圍，佢頂blingbling骷髏頭帽一出，已經「嚇盡」全場，好多人未埋枱已經先輸個勢。坐低開枱更不得了，原來阿Jenn十隻手指都戴晒戒指，洗牌時閃到對手眼都花，估唔到外國人打牌都興用奇招邪人。不過阿Jenn死口唔認出怪招，強調係自己style啫。
現年86歲、自稱係鄧麗君契爺嘅林友茂都唔弱，佢衣着普通，卻帶住本鄧麗君相集周圍貢，你話唔邪就假啦，邊有人唔棹忌死人嘢？林伯聲稱冇同小鄧打過牌，只打過羽毛球。唔知係咪有小鄧照住，林伯表現唔錯，晉身決賽呼聲幾高。
上陣不離父子兵，打牌不離父女檔。參賽者中有對父女落場，湯先生同25歲囡囡Queenie參賽，竟然咁啱得咁橋同一枱打牌，佢哋異口同聲話落場無父女，輸到貼地都唔會打籠通，兩個都話想攞冠軍，希望唔好因錢傷感情啦。為免參賽者出術或者擺陣轉運，大會安排每兩圈小休，但打牌期間唔可以去廁所，免得有人賴地硬行開轉運。成功出線嘅準雀王、雀后，唔知有冇因為要死忍而失水準？