好快又到季尾啦，由下期夜馬（7日）開始倒數11次賽事，《蘋果》馬經邀請到12位馬主一齊玩「標尾會」呢個貼馬遊戲。每期呢12位馬主一場貼四隻，互串連贏同複式三重彩玩法，每位每期本錢共三百，如果有冷馬入圍隨時有大利。

12位馬主個個買馬都有心得，其中呂少文十多年前已係本報舉辦呢類貼馬比賽之常客，而且命中率非常高。而曾向欣小姐更係上年本報舉辦之「季尾大激鬥」冠軍。

至於唐乃勤、伍燕梅及鄧文豪亦係本報舉辦呢類貼馬比賽之忠實支持者，今年再加埋「闖」系馬主張顯信、「辣」系馬主吳創木、「嘻嘻哈哈」馬主張佐治、「奔馳寶馬」經理人梁浩然、「課課快」馬主成員凌國龍、「為善聚樂」經理人黃錦財及「發盈喜」經理人葉棣謙，相信一定鬥得精彩！