內地通脹猛於虎，仲成為全球焦點，正當大家以為掌握全國數據嘅中央部門，係最權威嘅數據分析單位之際，瑞信亞洲區首席經濟師陶冬就話，中央嘅經濟師最冇料到，仲差過啲學生喎！
陶冬噚日開壇，對住大班中外傳媒話，舊年同今年，中央嘅經濟師對通脹嘅預測都估錯晒，嗰班經濟師成日話受到翹尾因素嘅基數效應影響，通脹先會咁高，其他嘢冇乜大變，如果實情真係咁，就唔需要經濟師啦，咁簡單嘅計算，學生哥都搞得掂啦！

通脹預測錯晒　差過學生

佢話其實舊年同今年嘅服務業價格已經升咗好多，舊年升2%，今年升成4%，仲有食品價格……至於佢自己點睇，佢就估內地通脹無咁容易回落，會較長期維持喺5%水平。
除咗通脹，梗係要講下個樓市喇！繼唔買香港樓後，陶冬又揚言連大陸樓都唔買！佢舉咗個活生生嘅例子─最近有朋友喺美國佛羅里達州，只係花咗15萬美金（大約117萬港紙），就已經買咗一幅好大嘅地，夠起4幢樓咁多，但呢筆錢如果喺上海買樓，最多只夠買起一個廁所；如果喺海南省，頂多夠買兩個廁所……
well，雖則話花旗國啲超平，但到時你又會唔會驚有恐怖襲擊咁呢陶生?

李華華
mailto:[email protected]