千呼萬喚終於開拍嘅無綫新劇《衝上雲霄II》，噚日喺尖沙嘴搞咗個晒冷簽約儀式，好耐冇幫無綫拍劇嘅吳鎮宇，今次同張智霖（Chilam），胡杏兒，馬國明，陳法拉等合作。飾演高級機師嘅Chilam同鎮宇，今次係喺電視上第一次合作大鬥演技，鎮宇講笑話已經好耐冇為無綫拍劇，不過唔會唔適應。

酬勞惹人妒忌

講到今次酬勞嘅加幅，鎮宇好無厘頭咁話：「我呢啲係好似一點幾熱門嘅賽馬賠率咋！唔好話畀同劇演員聽呀，費事惹人妒忌啦。」至於Chilam就話為咗呢部劇，推咗啲內地劇，仲會出動六位數字嘅私伙衫添：「今次係因為Tommy（梁家樹）出聲先至拍，我唔會諗賺少幾多錢，最緊要觀眾睇得開心。」
聽講今次監製要求杏兒剪短頭髮到好似男仔頭咁，杏兒話：「我之前為咗藝術犧牲咗好多次，我好耐都冇試過留長頭髮，我會同監製再研究吓，睇吓係咪真係要剪短。」至於馬國明會同江美儀發展姐弟戀，佢話現實生活中未試過，如果真係遇到都唔抗拒。