【智取大市】科技股漏網之魚（晉佳）
蘋果日報 2020/06/23 18:00
小米智取大市
港股升勢相當凌厲
華府玩彈弓手之後，港股沽完再倒升，至少短期內除去中美貿易協議呢個潛在負面因素，當然係好消息。
騰訊（700）挑戰500蚊，港交所（388）、中芯（981）、阿里健康（241）亦爆升，要注意呢啲股份超買自然要回氣，可能由其他股份接力，就等於美股裏面，中概股同美國二、三線科技股輪流炒一樣。
之前經常講ATMX，騰訊同美團（3690）累積升幅頗多，至於阿里（9988）未破頂，小米（1810）更加係大落後。小米礙於中印局勢，大家驚佔小米35%手機銷量嘅印度市場出現罷買潮，假如中印局勢進一步失控，小米會再受創。不過，中印衝突成為新聞頭條之後，小米到而家股價變動不大，有沽壓之餘，大家聽到佢係中印局勢大輸家，就更加耍手擰頭，令小米相對ATM嚴重超賣，但股價仍然喺壞消息陰霾之下，保持喺保歷加通道中軸之上尋獲支持。
中印局勢固然難估，但始終ATM已衝咗上去，資金進一步追捧騰訊風險唔細，遲早回流炒落後，講緊騰訊4.7萬億市值、單日成交153億，小米市值同成交都唔夠騰訊一成，資金要推郁小米難度低，加上小米向來喺升浪之中，有追落後嗰股後勁，等中印局勢緩和先買？或者應該等佢強勢破13蚊就要買了。
-----------------------------
-----------------------------