北京辦奧運不容有失，香港作為馬術協辦城市，被國家副主席習近平責成要親自過問奧馬工作嘅煲呔，噚日出巡視察雙魚河同選手村等奧馬場地。奧運馬術比賽係咪可以順利進行，唔好畀阿爺添煩添亂，除咗保安措施要方便公眾同時又防止恐怖襲擊，噚日本港出現今年最高氣溫帶出嘅另一問題，就係大家都冇法子對付嘅炎熱問題。煲呔習慣將最棘手嘅問題交畀馬房內嘅親信接手，今次要搞好奧馬，奧運馬術公司行政總裁林煥光、保安局局長李少光同警務處一哥鄧竟成簡直別無選擇，就算要瞓身做埋馬伕，都唔可以sayno。
作為馬伕之首嘅林煥光，噚日頗為得戚咁向煲呔展示，習近平參觀當日突然「條條fing」，由假天花跌出嚟嘅冷氣喉，已經執番好，煲呔撞吓都冇事，但唔係事事都咁易搞掂，煲呔巡視之時，本港錄得今年以來最高嘅34℃，全港熱氣衝天，奧運馬術賽場地嘅沙田同上水仲熱，最高溫分別係36.2℃同35.9℃。對於身價高昂，動不動要過百萬歐羅，即係起碼1,200萬港紙嘅參賽馬匹嚟講，咁熱嘅天氣，煲呔只係輕輕帶過，話係比賽總會有不可預測嘅因素，「（上屆喺）雅典亦一樣咁熱…凍嘅地方要克服、熱啲地方亦要克服。」

靚馬隨時熱到中暑

上屆雅典奧運，氣溫日日都三十幾度，香港就算再熱亦差唔得幾多。負責揹飛嘅林煥光，雖然已經準備咗聲稱係六星級待遇嘅全空調馬廐畀啲奧運靚馬享用，之不過，就算控制到室內氣溫，成日凉浸浸，但一到比賽之時，烈日當空，仲要啲馬匹落場參加場地賽同阻礙賽咁，一時間由室內轉到室外，氣溫濕度突變，咁樣考驗啲靚馬法，萬一有乜嘢頭暈身㷫中埋暑，林煥光隨時要上身。
阿爺一直好重視奧馬保安問題，煲呔口口聲聲話掂，企喺後面嘅李少光同鄧竟成就以笑容做回應。睇番政府點樣處理噚日煲呔出巡就知道佢哋點搞，就係事前冇通知傳媒，只係搵電視台去影吓同講幾句，其他記者見到電視畫面至知佢去咗巡視，咁做唔通就係政府口中嘅「保安冇問題」？

mailto:[email protected]