特首梁振英前排炒咗兩名局長後，有挺梁傳媒放風話商務及經濟發展局局長蘇錦樑Greg都喺被叮名單上，只係暫時搵唔到繼任人，所以唔叮住。點知阿Greg噚日真係差啲被叮走，不過係講緊坐叮叮、即係電車。
蘇錦樑噚日為6架動漫電車啟航做主禮嘉賓，啱啱喺內地農村做完義工返港嘅佢，唔知係咪係覺得呢個時刻坐上叮叮太過敏感嘞，所以佢全程冇上過電車，只係喺車廂外致辭，無論傳言抑或現實世界中，都避過被叮走一劫。

八方都有問阿Greg點睇被叮傳言？佢冇正面回應，只係話揣測性嘅嘢唔講喇，總之每位官員都有進步空間，佢會虛心聽意見。至於同老闆梁振英嘅關係，佢好取巧咁話，成個問責團隊都好團結同合作暢順，又形容同兩位被炒局長合作得好好，但兩人被炒件事佢都係睇報道先知。又話成個團隊好團結，點解事先收唔到風？
查實親梁傳媒話過，阿Greg嘅罪狀包括搞唔好港視及港台兩大問題，阿Greg強調港視發牌喺行會有充份討論；至於港台，佢唔明何謂要處理喎，總之港台按既定機制營運，明顯唔認同兩大所謂嘅罪狀。問到邊個係曾鈺成口中嘅蠢人？阿Greg冇答案，卻話放料嗰啲人若然對官員表現有意見，應該行出嚟講囉。有親政府報章噚日則引述港府權威消息人士，聲稱阿Greg同曾俊華都係被炒對象嘅報道係無中生有，原來親梁傳媒都造謠成性。

李八方
mailto:[email protected]