【李八方online】社協挑機范國威毛孟靜 邀睇《綠簿旅友》感受新移民之苦
李八方ONLINE新移民平權毛孟靜社區組織協會奧斯卡何喜華范國威議會陣線Green Book綠簿旅友
社協今日包場請新移民睇《綠簿旅友》,新移民家庭睇戲之時不忘高舉「不要歧視」等標語訴心聲。社協提供相片
近年好多社會問題,由社福、房屋到醫療,內地新移民都成為眾矢之的;社區組織協會亦唔例外,經常因為協助新移民被鬧爆。但有道理就唔怕講,社協今日(17日)包場邀請逾180名新移民,齊齊睇奧斯卡最佳電影、由真人真事改編嘅《綠簿旅友》(Green Book),為新移民打氣,希望佢哋好似片中黑人男配角,面對逆境自強不息。
社協主任何喜華同八方講,早前睇完《綠簿旅友》,戲中以輕鬆手法,講述上世紀60年代美國黑人點樣面對被人歧視,覺得好有意義,仲獲有心人支持,今日包場邀請新移民免費睇戲,唔少人睇到眼濕濕,感同身受。佢話好多新移民都自力更生,但近年不時被人無理抹黑,希望藉電影鼓勵新移民,受歧視時要不卑不亢,社會亦唔係個個人都排斥新移民。
新民主同盟范國威將於本周三喺立法會提出「改革移民及入境政策」動議,何喜華同八方透露,最近電郵范國威同議會陣線毛孟靜,自掏荷包請2人睇《綠簿旅友》,「希望大家可以多體會被歧視嘅人嘅困難同種族平等嘅重要」;八方問過范國威,佢話冇收到電郵,但早就睇咗《綠簿旅友》,覺得套戲如實反映當年美國實況,無論情節鋪排、男主角同男配角都演得好,仲分享其中經典一幕,就係黑人鋼琴家落車時被白人排斥,但又不獲黑人接納嘅困境,「係一套好戲」。
言歸正傳,范國威託八方轉告何喜華,佢喺美國三藩市讀大學,當地有反戰示威,亦有人爭取同志平權。弱勢社群點樣受壓迫,佢唔使睇戲都知,「較何喜華更清楚」,強調制定移民政策,要考慮社會嘅承載能力,先可以消滅不必要嘅仇恨,讓新移民融入主流社會,先係解決問題,「唔係天真問點解社會上有問題」。
毛孟靜亦話冇收過電郵,如果社協請睇戲,可以直接打畀佢,但認為社協唔好製造不必要議題。佢話10年前開始涉足政壇,第一個地區工作就係隨「同根社」探訪新移民婦女,了解佢哋苦況。毛話移居香港就係香港人,唔會排斥,「講緊嘅係未來唔可以無休止每日畀150人入嚟」,因為資源有限,本地人應有優先權。
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef