【賢仔Call馬】新舊馬混戰！「開心好友」有力一攻而破（廖浩賢）
蘋果日報 2019/12/17 20:15
谷草第二場廖浩賢開心好友賢仔call馬新舊馬混戰
開心好友（左）近兩場俱在谷草1000米入圍
周三（18日）晚谷草跑九場賽事，採用C加3欄跑道，跑法上前置貼欄馬匹稍佔優勢，三T有158萬餘元累積多寶，預計一注獨中有400萬。
騎師方面，今次比較喜歡華將座騎。其中，第二場由潘明輝策騎「開心好友」，上仗雖然不敵「閃電精靈」跑第二，但今次檔位、跑法均有所不同，好大機會可以反敗為勝先過終點。
第二場四班1000米：新舊馬混戰，六匹初出馬中只有「多姿多財」試閘較有睇頭，本身周歲時已由蘇利雲家族以15萬紐元購入，三課大閘兩度一放而回，做好基礎工夫才運港，進度自然來得快。
此駒在港四課大閘表現都對辦，潘頓騎羅廐初出馬亦係信心保證。
同場曾經出賽馬匹方面，「開心好友」與「閃電精靈」上仗同場包辦連贏位，當時「閃電精靈」係一步不蝕兼有莫雅座陣，贏馬姿態的確輕鬆。
今次形勢逆轉，「閃電精靈」於C加3欄排12檔出閘，能否早段切入存在好有問號。
相反「開心好友」形勢穩陣得多，首先負磅方面有18磅距離，本身跑過多仗顯示有前速，話雖排7檔，但實際於1至6檔內，只有「奇妙日」比較快腳。
「開心好友」理應可楔入守二、三位，只要咬住前領馬，入直路移出望空有力一攻而破。