韓國三大電視台噚日播出水木劇(逢周三、四播出)嘅最新一集，結果MBC《君主－假面的主人》、SBS《奇怪的搭檔》及KBS《七日的王妃》收視齊齊下跌，至於俞承豪、金所炫、L等人主演嘅《君主》就冧莊做收視冠軍。

《君主》噚晚播出最新嘅第29、30集，收視分別係10.1%及12.2%，雖然相比起對上兩集嘅10.8%及12.2%收視率小幅下降，不過依然保持做收視冠軍，甚至係三劇中惟一Keep住有雙位數收視；而池昌旭、南志鉉主演嘅《奇怪的搭檔》噚晚同樣播出第29、30集，不過收視就跌到得6.7%及8.6%，排同檔第二。至於朴敏英主演嘅《七日的王妃》就跌到收視新低，以4.7%收視率包尾墊底。