所以話波係圓嘅，講緊嘅係2018年俄羅斯世界盃非洲區C組外圍賽，榜首嘅科特迪瓦居然喺主場輸咗畀奧巴美揚無份踢嘅加蓬1:2，由於同組嘅摩洛哥作客又同馬里踢成0:0，即刻搞到呢一組嘅出線形勢七國咁亂。

加蓬今場兩個入波嘅球員都係喺歐洲搵食嘅，20分鐘先開紀錄嘅美耶就踢土超，之後喺30分鐘入波嘅勒美拿，就係今季先轉會英超修咸頓嘅。科特迪瓦踢到58分鐘由效力里昂嘅哥尼特破蛋，但係最尾都要輸波。科特迪瓦依家雖然仲係踢四場有七分排喺榜首，但係摩洛哥同加蓬都有六分同五分喺手，形勢都幾混亂㗎！