保皇黨、問責官員噚日喺立法會,齊齊坐到屁股都就快爛,為嘅都係要確保會議唔可以流會,其實何止佢哋,連一班俗稱「狗仔隊」嘅政制及內地事務局官員,亦喺立法會嚴密佈防,Mark實班議員,點齊人數,未夠九點已經擔定櫈仔,坐喺會議室前廳做嘢。有位女官員就夠醒目嘞,知道自己要由朝坐到晚,一早就帶埋樽裝水作好準備,以免因飲水要走開失職,佢閒時就睇文件「解悶」,有準備之餘亦夠上進。佢仲帶備兩部電話,帶埋hand-free做「CIB」,相信係用嚟聯絡議會內外同事,了解係咪夠人開會兼自我娛樂。不過,當拉布完畢,議事廳外會多咗嚿化石。