韓國一個護膚品牌，今晚喺四季酒店舉行活動，蕭芳芳、鍾楚紅、鄭裕玲、汪詩詩、諸葛紫岐同黎諾懿等等到場出席，芳芳姐著咗一條粉紅色嘅旗袍現身，品牌其中一個產品就以慈善性質賣出，首季受惠嘅機構就係芳芳姐嘅護苗基金。

諸葛紫岐因為早前開咗間娛樂公司，今日佢就帶咗兩個藝人現身，佢就話公司準備開新戲，希望可以5月開拍，而其中一位主角就係近期是非多多嘅張栢芝，問到諸葛紫岐擔唔擔心栢芝嘅工作態度，佢就話會同栢芝傾，但係向太同栢芝合作多年都係咁，佢就話：「但係我同佢相處過，覺得佢ok。」講到栢芝有兩個小朋友，會唔會怕時間難夾，佢就話佢自己都有小朋友，所以都會明白，係唔係唔怕栢芝失場?佢就話：「唔擔心，希望成件事會順利。」講到開咗咩條件俾栢芝，佢就話之前都未傾，依家就會喺合約寫到明。

諸葛紫岐今次人棄我取，真係好撐栢芝喎，佢就話：「係呀，我一向都覺得佢個人ok，都幾nice，第一次識佢嘅時候，大家都有打招呼，仲有打機。」諸葛紫岐又話栢芝個角色幾好，栢芝都好鍾意，但要遲啲先公布。喺戲中仲有幾個主角，因為有幾條故事線，但係栢芝要搶戲份喎，佢就話：「咁佢一定係主角，戲又好，我對佢有信心。」問到怕唔怕栢芝鬧情緒，佢就話情緒人人都有，相信栢芝會好專業。諸葛紫岐就話自己冇諗過演埋一份。