大市連挾兩日，但成交唔大，反映人心虛怯，冇咩人敢入場買貨。民企股反彈乏力，資金要覓出路，大折讓股係唔錯選擇，起碼有資產墊底，穩穩陣陣。
永泰地產（369）悉售英國男裝品牌非核心業務，勁賺2.75億元，股價上周五爆升一成，午市仲同附屬南聯（1036）突然停牌，疑似進行資產重組。無獨有偶，兩股停牌後，盈信控股（015）就開車，埋單升15%，成交亦急升至518萬股，升浪即將再現！
本欄2月首次推介此股，當時股價0.42元，單日最多飆4成，月內升至0.77元，累升83%，其後反覆回落至0.50元水平整固，上周五大陽燭突破降軌，升幅不容小覷。公司曾發通告，表示正考慮將旗下部份業務分拆上市，唔排除已有眉目，成為未來炒作誘因。
不過，盈信最吸引之處係大批優質物業，包括窩打老道地皮、薄扶林道地盤、通菜街酒店項目、彌敦道688號17個舖位，仲有灣仔活道1號舊樓項目84.4%業權，保守計值逾20億元，目前市值8.2億元，折讓近7成。有關物業多於今年落成，資產豐厚之餘，來年盈利更有睇頭！盈信現價0.55元，戰友首個目標係2月高位0.77元，潛在升幅4成，屆時仍較NAV折讓五成。

魏力