樂隊Mr.今日喺紅磡碼頭為新碟宣傳，雖然落住雨，但仍然吸引唔少歌迷到場，5位成員戴住面具現身，Alan話：「我哋今次隻碟冇影相，係搵朋友畫我哋啲樣出嚟，然後隨碟附送我哋嘅五官，畀大家隨意將我哋五官任砌，直頭係Mr.放題任砌。」佢哋希望呢個小玩意，係大家覺得值得收藏。

Mr.仲準備咗5架車，每架車載4位歌迷，分別去唔同地方，Alan話：「我帶佢哋去西環遊車河，呢個地方係我由細住到大，近年都變得快，帶佢哋去探討呢個地方有咩轉變，希望同歌迷有多啲交流。」

Dash就話：「今日感覺好似初出道嘅時候，好耐冇同歌迷一齊做宣傳活動，因為咁耐冇做，所以想重新再做一次；其實我哋喺香港生活咗咁多年，未必好清楚香港呢個地方，所以今日聽下歌迷對邊城有咩故事。」