今日年初二，伏勝先同各位拜年，祝各位今年事事順景、賺錢愈來愈多，最緊要係人人有份賺。
新年嘅例牌節目當然係拜年，伏勝同啲行家拜年嘅時候，順便打聽新一年有乜股票可以炒得起。據行家甲講，之前靜咗一排嘅意科控股（943）好似有番啲消息，而且重係一啲幾有震撼性嘅勁料㖭，話說佢哋決定咗唔做高科項目之後，開始做番啲有現金回流嘅項目，實行嚟個大轉型。近排重傳佢哋搵咗家國際級嘅公司，搞緊檔新業務，好快就會有嘢睇咁話。

中資石油股有捧場客
唔知係唔係有一班春江鴨已經聞風而至，喺過年前個兩個交易日已經將隻股踢到上兩毫子樓上，成交額重大番晒。聽講呢單嘢只係佢哋今年嘅頭炮，之後重會有一連串猛料爆，如果真係咁，隻股仔分分鐘可以爆到上兩毫半都唔出奇。

牛仔布殊上星期三話唔可以將伊拉克呢個問題留番畀日後國會同人民去處理，其實就係話到明要開波打伊拉克。好多人都有個疑問，究竟幾時會開戰？喺咁嘅情況下，投資者為咗要避險，只好從股市中撤退，轉玩隔岸觀戰。
不過有大行經紀朋友同伏勝講，大部份流走嘅錢都係玩開藍籌嘅錢，啲中資股重係有好多捧場客，就好似啲中資石油股咁，話說國際油價重有機會向上，對佢哋嘅業績會有正面刺激。聽佢哋講，除咗現有幾間證券行會維持石油股嘅投資評級外，已經有好幾間大行準備同佢哋重新寫過報告，話唔排除會調高佢哋嘅評級，同埋推介畀班基金去買，尤其係隻中海油（883），如果有諗過避戰而沽晒手上藍籌嘅客，不妨入番啲貨。
伏勝