利物浦上個禮拜六作客曼城，有翼鋒沙迪奧文尼舉腳過高踢中主隊門將艾達臣摩拉斯，畀球證罰紅牌趕出場，最後慘敗0:5。前曼聯後衛加利尼維利當時已經喺電視節目話球證今次畀紅牌係錯誤嘅判決，之後仲喺個人Twitter話，球迷喺嚟緊幾個禮拜，甚至係幾個月，會對球員被指舉腳過高嘅判罰感到好混亂。

點知加利佬呢頭講完，轉過頭就真係出現咁嘅情況。噚晚紐卡素作客贏史雲斯1:0場波，客隊中場馬特列治同樣係舉腳過高，不過球證就只係畀咗黃牌。其實唔單止加利佬咁講，英國亦都有其他球迷指英超嘅球證執法尺度唔統一，話一係就趕埋馬特列治出場，如果唔係嘅話，文尼就唔應該攞紅牌。