80後現在總被定位是一群沒有理想、怨天尤人、不能吃苦的年輕人，似乎有點一竹篙打一船人。83年出生的商台前DJ陳強，有理想有抱負，但查看他以往的訪問，總被指「自閉、不合群、得罪人」的後生仔，正如他所說中間出現了一些誤會。離開了商台的陳強，將目光放得更遠，他從沒擔心過離開一間大公司會失去任何東西，現時他正向理想進發，專心將《黑紙》大搞，將它發揚光大。撰文：葉雪
攝影：陳慧安
場地提供：KitchenM

一看到陳強的名字，必會想起他不服從森美的命令，接着就是早前他在訪問中惹怒林海峰（Jan），再翻看他過往的訪問，總被歸納為「不合群、孤僻、麻煩」一族，之後就寫他被商台解僱。日前陳強重提森美和阿Jan事件，對於被指違森美要求半夜入長洲，陳強說：「大家又有冇諗過我答應過100次，只係拒絕咗一次，嗰次佢（森美）冇畀我揀，所以我咪揀走囉。啲人成日話冇得揀，點會冇得揀呀，唔好再講話冇得揀啦，呢個世界咁多嘢有得揀。如果你喺埃塞俄比亞，面前得樹根，你唔食就會死，呢啲先叫冇得揀，香港人從來唔會冇得揀。」

「孤僻唔係罪」

陳強指森美根本沒將他sayno的事件放在心，只是有人將事件放大了，他說：「咁人哋同我做訪問，梗係會捉住呢啲做point啦，唔發大啲是非嘢去寫，邊度好睇㗎，我好明白呢個道理。」
解說完與森美的恩怨，再說到林海峰開咪「贈言」一事，話說陳強早前接受訪問，曾指903沒有人講及李克強訪港事件，反而談論《藍精靈》好不好看。之後林海峰在節目反問陳強有否聽過他所主持的《在晴朗的一天出發》，正正他與拍檔都有討論此事。事後不少人在討論區指陳強自視過高，陳強對此不願多談，他說：「我估唔到發生咁大牽連，我真係唔想回應林海峰呢件事喇，之前我喺blog都回應晒。」
不過陳強似乎真的「冇有怕」，事件發生後曾在facebook留言：「林海峰，我好驚。」字面看有雙層意思，究竟他真的驚林海峰還是暗指自己一點都不怕林海峰？問陳強會否覺得是越級挑戰？他說：「一係唔好講，講咗就預咗全世界都知，呢件事我唔會怪責記者或林海峰，我亦唔會改自己嘅立場，講得出就要相信自己，總之言語上有令任何人唔開心、傷害到人，我講聲對唔住。」總括過去6年在商台的日子，陳強強調是開心的，只是他比較孤僻，絕少參加同事間的聯誼，他形容自己為：「我唔結怨，但又唔結交朋友，我唔識social，但係孤僻唔係罪。」

讓阿嬌發聲

細訴完在商台的日子，陳強講到與好友阿Bu和林日曦合辦的文學刊物《黑紙》，態度明顯輕鬆得多，他離開商台的主要原因是為了大搞《黑紙》，希望將它變成精品。記得《黑紙》創刊時以鍾欣桐（阿嬌）做封面，問他不怕影響銷量嗎？他說：「我本來想約Twins，當時阿Sa（蔡卓妍）唔喺香港，我覺得阿嬌一個都OK，而且《黑紙》係想請啲俾人誤解嘅藝人，畀佢深層啲講自己想講嘅嘢。」如果《黑紙》是讓一些被誤會的人發聲，下一期的封面人物是否應是陳強呢？

陳強Profile

原名：陸家俊
出生日期：83年9月18日
學歷：香港城市大學主修環境科學與管理
工作：
．05年正式加入商業電台（今年6月離職）
曾主持節目《你聽我唔到》、《正義不正確》、《森美移動》等
．去年1月與阿Bu、林日曦推出偽文學雜誌《黑紙》

資料來源：《蘋果》資料室

「我唔係俾人炒」

很多年輕人渴望加入商台做DJ，一些DJ離職後受歡迎程度似乎大不如前，例如蘭茜、鄭家輝、茜利妹和有耳非文等。今年6月離開商台的陳強被問到會否擔心離開商台後的前景，他笑了兩聲說：「你點知你所講嘅人家唔開心，有啲冇做商台嘅人去咗做高層，雖然我唔知蘭茜家做緊乜，可能人哋結咗婚好開心好幸福。」

離開可以好快樂

陳強認為外間太多人用知名度和賺錢能力去衡量一個人成功與否，他說：「Wyman（黃偉文）家唔開心咩，鍾意寫吓歌詞、鍾意寫吓時裝專欄，每個人心目中嘅地位都唔同，所以我可以話畀大家聽，我離開商台都可以好好、好快樂，因為呢條路係我揀嘅。」最後他表示一直有傳他是被解僱，但事實不是，他說：「我一年前已經plan咗要走，半年前就落實，所以公司好多同事都知，我唔係俾人炒㗎。」