開鑼（2日）前夕，「美麗傳承」舉行盛大慶功宴，席間訪問掌舵人郭少明，對開鑼日第十場「美麗精神」的看法，佢話自己對呢匹馬嘅前景寄望甚大，然而大步馬長遠嚟計跑一哩或以上會更好。

至於跑法方面，幕後暫時都會沿用外地贏馬時嘅前領策略。或許以客觀因素來看，今仗要擺前走嘅馬似乎不少，希望憑質素可殺入一席位置。

今季韋達開操後四出爭取支持，表現積極，以致開鑼日本應可以出足，可惜尾場「孟買之星」造唔到磅。

睇返韋達嫡系座騎第三場「軍歌」，雖則話田草未贏過，但季尾一再喺田草級際賽入Q，不容忽視。

半冷門留意第四場「薪勇」，上季一再喺四班同程後上接近，今仗落班加上呢組快馬多，預計形勢對其更有利。

其餘心水第六場「舉世無雙」，上季尾最後一仗沿途蝕盡形勢跑第五殊不簡單，北半球馬今季更見成熟，季初試泥閘末段見史卓豐稍推，反應不俗。

同場主要對手有「快樂寶貝」，今季狀態來得快，暑期後評分低見60分，落四班跑肯定有着數！

文：阿Kit