法政匯思成立一週年有多，今日亦剛好係佢哋同其他專業團體聯署發表，反對政府濫用政治廣告一週年嘅日子，所以搞個茶聚同大家開心吓。八方去過唔少茶聚，但呢次真係相當特別，事關食物係由法政匯思各位成員親自炮製，估唔到咁多位法律界人物都係好廚師。

有人傳聞法政匯思派人選立法會，任建峰斷言話無啦，尋日純粹係聯誼吓啫，不過嚟緊佢哋都準備緊有關一地兩檢嘅立場書，等佢整理好、相信過埋活節就可以出台，佢透露，總之一地兩檢就行唔通啦。

任建峰就整咗味鹽水雞同醉鴨舌，非常唔錯，而講到賣相當然非「男神」梁允信整嘅日式蒸蛋啦，而吳宗鑾就主理相當地道嘅咖哩魚蛋，相當之搶手㗎﹗蔡麒、黃鶴鳴同埋鄧鈞堤分別整嘅金沙骨、三文治同埋曲奇餅，總之各有特式啦﹗