前高官羅范椒芬失意香港政壇，離開官場前留低兩句話：「關上一扇窗，打開一道門。」原來佢打開道門返鄉下，由佢家族基金捐錢成立嘅寧波市惠貞書院噚日舉行新學年開學禮兼高中部落成典禮，羅范同阿哥范鴻齡做東，包來回經濟位飛機票連食宿，請咗十幾個香港教育界人士去高興吓，「教育女王」重整旗鼓，轉戰寧波大展拳腳。
熟悉羅范人士同八方講，羅范兩兄妹喺香港政商界各領風騷，寧波范家都好巴閉，係明朝高官范欽後人，范欽私人藏書樓天一閣有逾500年歷史，𠵱家變成博物館係當地名勝，范家此行都有安排參觀，等大家知道佢哋家族幾咁顯赫。羅范母親倪愛貞據講都係當地望族之後，惠貞書院就係以佢父母范惠卿同倪愛貞命名。

范家96年捐款成千萬人民幣成立惠貞書院，學校佔地40畝,有1,900個學生，今年開辦高中部，中小學收生升學一條龍，羅范噚日獲當地教育局頒發榮譽校長證書，在場人士向八方報料，話羅范表現興奮，講笑話榮譽校長得個名，實際工作要等校長安排，不過佢一定唔會喺度教書喎。羅范以前瞓身推動教改，家族辦學更加任佢搞，參觀過嘅人話，呢間學校實行小班教學，又有網上學習同請外籍老師教英文，總之羅范想喺香港搞嘅改革，呢間學校都走唔甩，加上有羅范兩兄妹搭路，學生唔單止有獎學金去美國升學，據知更已同男拔結盟，學生可以嚟香港做交換生。
以前教統局鍾意嗌口號，「樂善勇敢」、「求學不是求分數」、「創造空間、追求卓越」等講得口響，得羅范主持大局，惠貞都有樣學樣，辦學宗旨、目標係「一切為學生的發展，集東西方教育之長」，仲有教學16字真言：「提高質素、加強基礎、注重實踐、發展個性」。
據同行人士稱，羅范對教育熱誠不減，從佢對惠貞嘅投入程度，相信佢仲有滿腹大計希望落實，不過佢話內地官方對教育抓得好緊，一條龍辦學概念仲係試驗性質，「教育女王」霸道作風相信喺國內行唔通，好彩來日方長，羅范有的是時間，十年樹木，百年樹人，教育始終係要慢慢搞嘅。