民主黨立法會議員尹兆堅係黨嘅勞工政策發言人，對勞工事務都好熟悉，但唔講唔知，原來佢有個細佬喺勞工處做總勞工督察，而家仲係公務員工會聯合會副主席，尹兆泰外型高高瘦瘦、黑黑實實，身型fit爆，同大佬白白淨淨、圓碌碌嘅外型有好大分別，若非公工聯總幹事梁籌庭介紹，真係睇唔出佢哋關係。

尹兆泰話，佢哋一共有四兄弟姊妹，尹兆堅係大哥，佢係二佬，對下仲有個細佬同妹，佢一直冇刻意公開阿哥身份，所以唔係好多同事朋友知道尹兆堅係佢阿哥，但試過有人見佢哋個名咁似，就聯想到兩人有親戚關係，佢試過直認尹兆堅係佢阿哥，但對方反質疑佢講笑。

尹兆泰話自己比較鍾意運動，所以冇出現中年發福。以前阿哥都有踢足球，但近年公務繁忙，可能因為咁肥咗啲。阿哥係反對派，經常狠批政府，但尹兆泰話由於自己主要負責執法工作，所以同哥哥冇乜大衝突，而兩兄弟都好少討論工作上嘅事，佢仲講笑話都支持阿哥爭取將公眾假期同勞工假日數睇齊，因為佢發現有個別勞工處新同事連兩類假期嘅分別都分得唔太清楚，統一咗仲可以方便執法。

尹兆泰任職勞工處已20幾年，十年前加入勞工督察會，之後成為主席，約兩年前佢仲獲選為公工聯副主席，尹兆泰話，喺家公務員工會出現青黃不接問題，佢希望可以出一分力，為更多公務員爭取權益。