吳業坤同谷婭溦今日喺土瓜灣出席活動，谷婭溦因撞車遲到，佢解釋：「入隧道嗰陣畀人追尾，人冇事但好驚，不過上年都畀人撞過，又係追尾，我會去拜神。」

谷婭溦仲話上台之前個心仲跳得好快，坦言有啲陰影：「呢個月都唔想揸車住，不過唔揸車返工真係好唔方便。」谷婭溦活動後又要趕去機場，佢透露爸爸身體唔係咁舒服，所以抽空返北京陪家人。

坤哥喺台上獻唱時除咗外套，搞到飛晒釘，事後佢好抵死咁話：「人之常情啫，今日啲街坊又好熱情，我住樂富㗎嘛，細個成日踢拖落嚟，o依家又成日去九龍城消夜，所以呢區我都好熟。」佢仲話希望去勻18區busking，就算會被途人集郵都唔介意：「呢啲好呀，越多越好，我好想現場咁接觸啲街坊。」

坤哥又話新年目標係操六嚿腹肌：「應該仲有一、兩個月就得，係時候㗎喇。到時慳番啲服裝錢，仲要影寫真。」係咪雄風寫真先？佢就話：「本身都雄風，想玩番啲成熟啲嘅造型，而且可以多啲機會。」

再問到會唔會接受露股演出？坤哥笑謂：「我對前面有信心啲，之前闊身都激凸啦，嗰啲睇劇情需要同藝術性，我唔會為露而露。」

精選娛聞，喺晒《娛果》
http://fb.com/appledailyent