政府宣傳標語都有話「開車前，咪飲」，但通常去到大時大節，梗有人會以身犯險。每逢聖誕假臨近，警方例牌喺各區進行嚴打「酒後或藥後駕駛」，仲會設路障向司機進行酒精吹氣測試抽查。《蘋果》收到消息，有位港台前DJ，今朝早就因為涉嫌酒駕被捕。(新聞連結： http://bit.ly/2DA4ZQU )

據知，被捕嘅前DJ就係羅啟新(Cuson)，佢今早10點左右，喺觀塘apm對開，被路障截查，結果顯示體內酒精含量超標近1倍，涉嫌酒後駕駛被捕帶署，到下午3點幾，獲准保釋，離開東九龍交通總部。

就Cuson涉嫌酒駕被捕一事，《蘋果》聯絡咗港台電視部發言人伍曼儀，佢回應指：「據了解，公司於今日11時40分收到消息，但今天為假期，是羅啟新的私人時間，加上未能聯絡，故不宜評論。」

52歲羅啟新，喺港台任職電視創意總監，曾經係長壽節目《晨光第一線》嘅主持人，不過上年港台二台「大地震」，之後就調咗去電視部門。

更多娛聞，喺晒《娛果》
http://fb.com/appledailyent