喺舊年4月熄機嘅亞洲電視，原來真有不死身，估唔到事隔一年幾，宣佈將會透過「OTT」（Over-The-Top）網絡電視方式營運，喺周一(18號)將會舉行大型記者會，公佈有關詳情。曾經分別喺無綫同英皇娛樂擔任高層嘅吳雨，o依家獲委任做亞視行政總裁，今次搵咗唔少猛人助陣，聽講有朱慧珊、陶傑、陳志雲、葉雅媛同曾華倩等等！

日前亞視已經將官方嘅fb專頁改名做「亞洲電視 - 你的電視」，喺網頁裡面，除咗有以前亞視嘅經典節目，好似《今夜不設防》、《開心繼續笑》、《方太美食廣場》等等嘅節目俾網民重溫之外，同時仲見到有一系列嘅節目，好似有《大偵探》、《零用錢工房》、《筆是潮人》、《輕鬆講馬》同埋《魔‧地道》等等，睇嚟呢啲都會安排喺新頻道播出！

除此之外，佢哋仲搞咗個你藝人招募計劃，之後喺FB進行直播決賽，喺決賽中段開放俾觀眾喺網上投票，最高嘅兩名參加者將勝出比賽，獎品除咗有藝人合約，聽講仲會有豐富獎品喎！但係跟住會有啲乜嘢工作安排，暫時未見有公佈，只係話報名喺24號截止報名，決賽日期另行公佈！

更多娛聞，喺晒《娛果》
http://fb.com/appledailyent