入行36年嘅美魔女溫碧霞（Irene），51歲之齡首次開個人演唱會，其處女個唱會《溫碧霞海潮演唱會2018》今晚假座旺角麥花臣場館舉行，老公何祖光帶8歲囝囝何國倫（Xavier）撐場，另曾跟Irene合拍電影《我未成年》嘅袁潔瑩亦現身撐場，還有林建名、麥子樂、袁嘉敏、尹揚明、漢洋、余慕蓮、蘇珊、薰妮及鄧月萍等捧場，九成入座率，現場以中年觀眾佔多，集體回憶Irene嘅經典。

演唱會8時35分開騷，台上先播出Irene嘅成長片段，由幾歲小朋友開始，之後入行拍《靚妹仔》，還有唔同時裝同古裝造型，當時包括經典跌膊look，到尾聲時更加有結婚look、泳衣、露背性感寫真等，之後仲有唔少古裝同時裝嘅造型，當然唔少得晒膊頭嘅造型。

個唱打頭陣嘅第一首歌，係《海潮》。身穿紅色玫瑰花deep V裙嘅Irene，櫻花樣下韆鞦架獻唱，雖然第一次喺香港開騷，Irene嘅高音位都幾穩定，唱得ok。

之後Irene開始唱別人的歌——《愛與痛的邊緣》。唱完兩首歌後，Irene就話：「好開心，由細到大，呢個係我第一個演唱會，大家都知我15歲拍第一部戲，我一直好鍾意演戲，直到拍《海潮》時，有監製叫我出碟叫《海潮》，當時有好多美好回憶。大家鍾唔鍾意海潮呢個角色？」台下大叫鍾意，Irene再話：「所以今次用海潮呢個名做演唱會名，希望可以用音樂分享我嘅感受，陪着我走。」跟住Irene唱出盧冠廷嘅《陪着我走》，話晒Irene都真係曾經出過唱片做歌手，所以唱得唔錯，歌聲幾入咪，高音依然去到0架！

精選娛聞，喺晒《娛果》
http://fb.com/appledailyent