本欄於九月二十一日講「殺君馬者道旁兒」，話明唔敢肯定呢句話點解。讀者非常熱情，立即電郵傳來大量網上資料，收收埋埋，打印出嚟，竟然有半cm（厘米）咁厚。睇完之後，知道解釋相當一致，茲簡錄如下：
古書《風俗通》（東漢作品）內有一個故事：長吏食重祿，芻犒豐美，馬肥希出，路旁小兒觀之，卻驚至死。按：長吏馬肥，觀者快馬之走驟也，乘者喜其言，驅馳不已，至於瘠死。
白話解釋：官吏養咗一匹馬，好少出嚟，某日騎出街，路旁邊啲細路齊聲叫好，官吏騎住匹馬，聽到喝采聲，覺得好威風，於是策騎匹肥馬，猛咁跑，卒之跑死咗。

殺死匹馬嘅兇手係邊個？追源禍始，元兇就係路旁邊不斷大聲嗌好嘅小兒，幫兇就係只顧威風，不顧馬兒死活嘅馬上人。以現代足球嚟講，所有球迷都向施丹、碧咸、亨利等球星拍掌歡呼，球會唔敢將佢哋休息，於是佢哋踢完聯賽，又要踢歐洲賽，跟着係國家隊，卒之踢到殘，愈踢愈沉。最近AC米蘭唔肯放卡卡、卡富等人返巴西踢友誼賽，引起國家隊與球會衝突，就係一個「保護馬匹」嘅例子。好多時，摧毀球星踢波生涯嘅，就係球迷與球會。
政治上，參加競選嘅候選人就係隻馬，路旁兒就係選民，選民如水，既可載舟，亦可覆舟。邊個選唔上，只好歎一句係選民嘅選擇，埋怨配票、報紙誤導，都係賴地硬啫。
由此引申，原來不少明星歌星自殺，都係恐怕再不能得到旁觀者掌聲、歡呼聲，冇晒面子，故此了結自己一生。蔡元培不愧係一代猛人，知道呢個道理，故此「迄可小休」，真係知所進退也。