老婆：又話升咗職？點解啲家用冇多到㗎？
老公：淨係升咗職，冇加人工嘛！
老婆：做多咁多嘢冇人工加你都制？
老公：公司淨係加咗房屋津貼咋！
老婆：咁都算加咗！做咩唔加家用？你係咪喺出邊……
老公：嘩！你咪亂諗嘢啊。加得嗰少少錢我可以做得啲乜嘢？《僱傭條例》都話「工資」唔包括僱主提供居所嘅價值，咁計嗰啲病假錢、長期服務金都冇得計埋房屋津貼落去㗎！
老婆：你咪呃我！《僱傭條例》規定，「工資」係指僱主以金錢形式支付僱員作為佢所做，或者將要做嘅工作嘅所有報酬、收入、津貼、小費同埋服務費。

雖然法例話有例外，例如老闆畀間屋你住，或者實報實銷嘅房屋津貼，就唔算係「工資」，但係你老闆現在加畀你嗰啲，係純粹以「房屋津貼」為名嘅報酬，依《僱傭條例》規定，就算係「工資」嘞。僱員嘅年假薪酬、假日薪酬、疾病津貼、代通知金、遣散費或長期服務金等等，都要根據呢個工資嘅定義計算。
老公：哎！怕咗你！加多三百蚊家用畀你囉！
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
資料提供：勞工處勞資協商促進科

服務熱線
電話：29908288
傳真：23702192
電郵：[email protected]