現年37歲嘅鍾欣潼（阿嬌）今日香港時間凌晨同下周一便33歲嘅台灣「醫界王陽明」賴弘國喺美國洛杉磯舉行婚禮，堪輿家麥玲玲表示佢哋雖然9月喺香港擺酒先註冊，但由於中國傳統以儀式行先，所以佢哋今日搞咗party都算做咗夫妻。

麥玲玲今日接受《蘋果》電話訪問：「阿嬌屬猴，佢老公肖牛，計番美國時間25號中午，係建日，以前古時建日係訓練馬匹，今日算中吉日，對猴同牛兩個生肖都好夾。」問到阿嬌婚後好唔好生養？麥玲玲話：「佢幾好生養，可以生到兩到三個小朋友。」麥玲玲話阿嬌同老公會互旺大家：「阿嬌冬天出世，係水旺，老公就夏天出世，火旺，佢哋互補大家。」