張柏芝拍攝飛車片段受傷入院，有報道指謝霆鋒對柏芝由憐生愛，被問到柏芝會否希望東東探病時，霆鋒說：「我唔講，呢條友咁鬼囗！」而東東昨亦謂有人借本雜誌放飛箭做縮頭烏龜，矛頭似指向霆鋒。

日前有雜誌報道，指謝霆鋒對張柏芝由憐生愛，在柏芝受傷後，一連兩日也抽空到醫院探望，又指霆鋒不滿陳曉東（東東）小氣，經常對柏芝呼呼喝喝，該雜誌記者問霆鋒，柏芝會否希望東東前來探望，霆鋒即說：「我唔講，呢條友咁鬼『囗』（意指衰咗，很瘀）！」

東東：冇講大話
儘管霆鋒前日否認曾說東東「囗」，但東東昨日在「番禺香江野生動物世界」拍攝華裔小姐外景片段，被記者問到霆鋒所講說話時，東東說：「嗰本雜誌所寫嘅係佢哋立場，並唔代表事實，但呢件事我好唔開心，人哋鬧我，我可以瀟灑唔記得，但莫須有嘅罪名，就一定要講。
「我從來冇講大話，當日有記者問我柏芝狀況，我話唔應該由我講，結果俾人執住打麻雀呢件事去講（東東指柏芝當日曾笑說想打麻雀），話我博宣傳，由頭到尾都係記者追問我，我答番佢哋！」

不會跟霆鋒溝通
未知東東可會主動跟霆鋒溝通一吓？東東說：「冇，唔需要，啲人唔應該立亂批判我，因為任何男女關係或者朋友關係，冇一個人講嘅嘢係真理，因為佢唔係上帝，反而有人借本雜誌放飛箭做縮頭烏龜，夠膽講唔夠膽認，夠膽就出嚟講。」
東東矛頭似乎直指霆鋒，但東東經理人羅嘉慧隨即代東東打圓場說：「佢係指記者！」東東又聲稱未有受近日新聞影響心情，他說：「如果我俾呢啲無聊新聞影響就唔係男人啦！」有指霆鋒追求柏芝，但東東一臉冷淡說：「我冇興趣知，亦唔關我事！總之成件事我想講嘅係責任問題，柏芝飛車係咪我一個人嘅責任呢？」