今日係哥哥張國榮離世11周年，星光大道哥哥嘅手印旁，大批歌迷來獻花及哥哥的珍貴圖片，其中有來自「北京榮迷會」送上馬騮公仔俾哥哥，仲有大型心形花牌，一片花海，盡現思念之情。現場落住毛毛雨，更形傷感。

嚟自廣州嘅黎小姐，同幾個朋友一齊來港，黎小姐話佢上年開始鍾意哥哥：「鍾意聽佢嘅歌，同佢嘅為人。」上年哥哥離世10周年紀念，舉行多個大型紀念活動，黎小姐自言因為咁了解哥哥多咗，覺得未見過真人有啲遺憾，不過黎小姐話會學習哥哥嘅為人，要有優秀品德，等年輕人都知道哥哥對大家有幾重要。

另一位張小姐都係一行十幾個朋友從廣州嚟，佢仲著住有哥哥頭像嘅T恤。佢話鍾意咗哥哥有20年，最鍾意歌曲《風繼續吹》，當年哥哥喺廣州開過兩次騷，張小姐有睇97年嗰次。張小姐自言唔係歌迷會成員，今次來港係自發性嘅，又話喺內地都有歌迷成立QQ群組，每逢哥哥嘅生忌同死忌都會自發搞活動。

杜先生一樣著住哥哥頭像Tee來向哥哥致敬，佢話今次自己一個人由山東來港，第一次參加紀念哥哥活動，佢話自己14年來，從歌到電影及為人，都對哥哥非常欣賞：「佢無可挑剔，我愛他左右手。」