陳貝兒早前被爆同結婚6年嘅老公正辦離婚，噚晚佢係灣仔會展為一個名錶酒會擔任司儀，同場有張名雅同岑杏賢。陳貝兒話o依家嘅佢會全心努力工作：「上次記者會之後好多女仔朋友關心我，問我係咪要重出江湖，其實我o依家只係回復單身，隻腳都未踏入江湖。」

講番佢主持嘅節目《嫁到這世界邊端》，當中有好多旁述講到好多感情有時會配錯，好似陳貝兒有感而發，佢話：「係集體創作，當時公司都未知我狀況，但的確自己感受好深，唔係淨係話我，希望有類似經歷嘅女仔都會共鳴。」

節目提及婚姻係賭博，陳貝兒話真係有感而發，目前跟前夫分居一年，而離婚手續就辦理中，佢話同前夫仍有聯絡：「其實做得番朋友，我仲慢慢適應緊，有工作就會投入啲，女人係唔可以太得閒，一得閒就會胡思亂想特別喺夜晚。」佢強調只係情緒有高有低，並唔係要做傻事。講到喺節目入面，受訪嘉賓未喊你就喊定先，陳貝兒話：「唔係完全唔開心嘅眼淚，有啲係替人開心。」目前以工作為先嘅佢話：「唔想隨便搵個伴，同埋好講緣份，我耐心靜待下一段(緣份)啦。一切睇緣份，現階段仲適應緊，而且我相信一次唔開心唔代表一世唔開心。」

另外，岑杏賢嘅舊愛袁偉豪早前宣佈同張寶兒拍拖，岑杏賢話：「好替佢哋開心，我有私底下message恭喜佢，最緊要佢搵到鍾意同合適嘅人。」又話知道袁偉豪拍拖後自己冇唔開心，亦衷心祝福佢哋，心情勁靚嘅佢又透露：「最近識咗好多異性朋友，但未有合眼緣嘅出現。」